Qadın sağlamlığının əsas dayağı – ginekologiya

Qadın sağlamlığı təkcə şəxsi rifahın deyil, həm də ailənin və bütövlükdə cəmiyyətin gələcəyinin əsas sütunlarından biridir. Qadınlarda tez-tez rast gəlinən xəstəliklərin əksəriyyəti vaxtında aşkarlanarsa, uğurla müalicə olunur. Bu baxımdan ginekoloji profilaktik müayinələrin rolu əvəzsizdir. Ginekoloqa müraciət yalnız problem yarananda deyil, heç bir narahatlıq olmadığı halda da vacibdir. Çünki bir çox ginekoloji xəstəliklər uzun müddət gizli inkişaf edir və gec mərhələdə ciddi fəsadlara səbəb ola bilər.

Profilaktik müayinələr uşaqlıq boynu xərçəngi, yumurtalıq kistaları, endometrioz və hormonal pozuntuların erkən diaqnostikasında mühüm əhəmiyyət kəsb edir. Məsələn, Pap-smear testi uşaqlıq boynu xərçənginin ilkin mərhələlərini vaxtında aşkar edir və bu zaman müalicə çox uğurlu olur. Bundan əlavə, müntəzəm olaraq aparılan ultrasəs müayinələri reproduktiv orqanların ümumi vəziyyəti barədə ətraflı məlumat verir.

“Qadın sağlamlığına göstərilən diqqət, əslində gələcək nəsillərə edilən ən böyük investisiyadır.”

Dr.Fatimə Hacıyeva

Qadınların profilaktik müayinələrə məsuliyyətlə yanaşması gələcəkdə analıq imkanlarının qorunması, ailə planlaması və həyat keyfiyyətinin yüksəlməsi baxımından son dərəcə vacibdir. Sağlam qadın – sağlam cəmiyyətin əsas təməlidir.